我見過最常見嘅情況係咁：一間診所比咗錢做「本地 AI」，交付之後發現個系統每次回覆都要連網，一斷線就死。問返轉頭，對方話「本地」係指「安裝喺你部電腦嘅程式」，模型喺 AWS 跑。
技術上唔算騙人，但跟你想要嘅嘢完全兩件事。所以你問問題嘅時候，要問到具體到冇得走位。
A. 資料流：呢三條答唔清就唔好簽
01斷咗網線之後，系統仲可以完成邊啲功能？請你喺我面前拔線示範。
答「大部分功能可以」＝即係有部分唔可以。要問清楚係邊部分，同埋嗰部分會唔會處理客戶資料。
02由我輸入文字去到出結果，中間經過邊幾個 IP／domain？有冇邊一個喺香港以外？
答「唔會上傳」（但答唔到經過邊啲 IP）＝唔可靠。叫佢喺你部機開著 network monitor 行一次，你自已睇。
03你哋公司嘅員工，喺安裝過程同之後嘅支援，會唔會接觸到我嘅實際檔案內容？
答「只會接觸到 log」＝要追問 log 入面有冇原文。好多系統嘅 debug log 會連 prompt 一齊寫落去。
B. 硬件同場地
04部機放喺邊？我哋自己嘅 server 房、你哋公司，定係租 data centre？
答「放喺我哋度，托管形式」＝你嘅資料喺人哋手上，唔算真正 on-premise。
05需要咩電源、散熱、噪音水平？放喺我哋前台隔離會唔會太嘈？
答「同普通電腦一樣」＝高階 GPU 機唔止 300W，好多細辦公室嘅插蘇位／冷氣負荷唔夠。
06部機壞咗，我哋嘅資料讀唔讀得返？有冇獨立備份？備份放邊？
答「有備份喺我哋 server」＝即刻問：備份加唔加密、你哋有冇 key。
C. 模型同質素
07用邊個模型、幾多 parameter、咩量化版本？喺我部機上一秒出幾多個 token？
答「用最新嘅 GPT」＝即係唔係本地。本地唔會係 GPT。
08用我哋真實嘅 20 份文件（已遮名）做一次測試，出報告。可以嗎？
答「我哋有其他客戶嘅 demo」＝唔關你事。你嘅文件格式、字體、掃描質素同人哋唔同。
09模型會唔會拿我哋嘅資料再訓練？如果會，資料留喺邊、幾時刪？
答「會越用越聰明」＝即係你嘅客戶資料被寫入模型權重，之後你要求刪都刪唔清。
D. 交付同驗收
10驗收標準係咩？寫成可量度嘅數字（例如 100 份單據，欄位準確率幾多 %）。
答「你覺得好用就得」＝冇標準，之後一定拗。
11如果達唔到驗收標準，點算？會唔會退款或者唔收尾數？
答「我哋做咗好多年，唔會唔得」＝要寫入合約。呢句說話冇法律效力。
12我哋同事要學幾耐？有冇一頁紙嘅操作說明（唔係 40 頁手冊）？
答「好簡單，教一次就識」＝你要求佢交付一份你自已寫得出嘅操作步驟。
E. 保養同更新
13月費包咩？唔包咩？超出範圍點收費？
答「包晒」＝要求列明「包」嘅具體次數上限。冇上限嘅承諾通常維持唔到一年。
14新模型出咗，幾時幫我哋升級？升級會唔會影響現有流程／要唔要再收費？
答「自動更新」＝自動更新係風險。要有版本記錄同可以 rollback。
15你哋公司如果執笠／我哋想轉供應商，我哋可唔可以自已繼續用落去？
答「我哋唔會執笠」＝冇答問題。要求原始碼托管、或者至少完整嘅安裝文件。
F. 離場：最少人問，最多人後悔
16合約完嘅時候，你哋會唔會刪除手上所有我哋嘅資料？幾日內？有冇書面確認？
答「會」但冇寫落合約＝等於冇承諾。
17我哋嘅設定（prompt、規則、流程）可唔可以匯出成檔案帶走？
答「喺個系統裡面」＝即係帶唔走。呢個係最典型嘅鎖定（vendor lock-in）。
18如果三年後我哋要換機，舊機嘅資料點搬？你哋收幾錢？
答「到時再算」＝到時你冇議價能力。搬遷費應該喺簽約前講明。
點用呢份清單
唔需要一次過問 18 條。實際做法係：先 email 三條（第 1、2、7 條）過去，睇對方答得幾具體。
答得具體嘅，通常會即刻約你示範拔網線。答得含糊嘅，會回一堆「我哋高度重視資料安全」之類嘅字——咁你就知下一步要點做。
另外，呢份清單唔止用嚟審人，亦係用嚟審自己：你自已知唔知道，邊個工序真係要 AI、邊個工序其實一個 Excel 公式就搞掂？我見過唔少公司花錢做 AI，最後真正常用嘅只有一個自動填表功能。呢篇講咗幾個實際情況。
如果你手上已經有份報價，想有人幫你睇下有冇位，可以直接 send 過嚟。免費，我照直講。